Nga Gjakova, ku hodhi hapat e parë, në Tiranën e sukseseve. Më tej në Izhev, qytetin e dashurisë së tij, e mandej në skenat botërore.Një dyzim që e dëshiron gjithmonë, aq herë sa shpirti i tij gjendet mes dy dashurive; muzikës dhe jetës. Kështu ndihet i lumtur, i plotësuar dhe përherë nostalgjik. Në të vërtetë çdo artist ka pak nga këto, por teksa të flet, ndjen se dashuria tek ai fle gjithmonë, ashtu e brishtë, e çiltër si vetë muzika, plot tinguj, si notat. Tregon se në familje ka qenë përherë nota e shtatë "Si" dhe kjo i pëlqen. Aq më tepër kur kjo gjë dokumentohet dhe mes rreshtave të pafund të një libri.

Një libër kushtuar atij, dashurisë, jetës, muzikës, familjes dhe dinastisë më të famshme të muzikës shqiptare, Mula. Një vepër që ka mëse një vit që është ngjizur, ka marrë formë, por ende nuk është "pjekur" për të qenë ajo që duhet t'ju dhurohet, atyre, të mëdhenjve të muzikës shqiptare. Për të po punon Mustafa Gërcaliu, i cili s'kërkon tjetër gjë, përveç dëshirës dhe dashurisë për të ngritur një tempull të pavdekshëm me titullin "Mes dy dashurive". Eshtë një libër për Artistin e Popullit, Avni Mula, i cili sot është vetëm një "i moshuar" 80-vjeçar, (siç dëshiron të shprehet edhe vetë. Ende nuk iu është ndarë pentagrameve dhe ende kërkon të bëjë diçka, megjithëse tregon se nuk ka kohë. Tashmë po punon për të realizuar librin, që i kushtohet atij dhe familjes së tij të njohur, Mula, që i ka dhënë aq shumë vendit, duke e prezantuar dhe në mbarë skenat dhe teatrot botërore. Për gazetën, mjeshtri i muzikës rrëfen detaje rreth realizimit të librit.
Eshtë një libër, i cili ka mëse një vit që është nisur të shkruhet. Ishte një dëshirë e mirë, pasion dhe dashuri e autorit Mustafa Gërcaliu, për të realizuar një libër të madh për familjen time, mua, Ninën, Invën, Adelinën, shoqërinë e muzikën. Kam kohë që punoj bashkë me të për të hedhur në rreshta të gjitha ato të vërteta të jetës sime, të cilat tashmë janë të dokumentuara të gjitha.

Eshtë menduar si një libër monografik, për ju?
Jo, nuk është tamam monografi. Eshtë menduar si një libër që do të ketë më tepër se 300 faqe, por do të shoqërohet edhe me fotografi, të cilat nisin që 100 vjet më parë e deri në ditët e sotme. Janë rreth mbi 250 fotografi të papublikuara më parë, që unë i disponoj në familjen time, me të cilat po punojmë aktualisht. Libri është i ndarë në kapituj të veçantë, që nis me fëmijërinë time dhe familjen time në Gjakovë, pastaj mbarimin e konservatorit, dashurinë me Ninën, Invën dhe Adelinën, etj.

Si do të titullohet vepra kushtuar një dinastie?
Autori ka menduar ta titullojë "Mes dy dashurive". Një titull që më pëlqen dhe më bën të ndihem mirë, pasi mes faqeve të tij do të fshihen mjaft dyshe. Unë dhe bashkëshortja ime Nina, fëmijët tanë dhe muzika, Kosova, Shqipëria dhe Rusia, Mustafaj dhe familja Mula, pra duke nxjerrë në pah domethënien e këtij titulli aq të gjetur nga autori, ku vjen e gjallë e gjithë jeta ime, kujtime të vërteta, familja ime, sukseset e mia, zhvillimi, sukseset e Ninës, Invës, si iku nga Shqipëria, si erdhi...Autori e ka shkruar me shumë dashuri e ndjenjë këtë libër, i cili pritet të dalë së shpejti. Madje, në të është menduar që përveç kujtimeve të dokumentuara të përfshihen brenda edhe dialogë mes shkrimtarit dhe neve.

Cila është pjesa më pikante në vepër, të cilën ju e keni ndjekur që nga fillimi i nisjes së saj?
Në të vërtetë është një qytet i bukur, pak rëndësi ka se çfarë pamje sheh, apo nga cila anë e sheh. Nuk di se cila pjesë është e bukur, por titulli i saj më pëlqen. Dashuria është ajo që e lartëson, e nderon, që shihet me sy e preket me dorë në këtë vepër që mezi pres të botohet.

• 250 fotografi
  janë përfshirë në librin kushtuar familjes së muzikantëve Mula, i cili mendohet të dalë së shpejti nga shtëpia botuese "Onufri"
• 100 vjeÇare
  janë disa nga fotografitë e familjes Mula, të cilat do të botohen për herë të parë në këtë vepër, që titullohet "Mes dy dashurive".

Pasardhësit Mula

I martuar me një nga vajzat më të bukura ruse, Nina Mulën, e cila ka një meritë të veçantë në suksesin dhe arsimin e vajzës së tyre Inva Mula, e cila sot ka prekur gjithë skenat botërore. Vetë kompozitor dhe këngëtar, dy vajzat muzikante, bashkëshortja po ashtu. I së njëjtës linjë dhe gjenezë familjare është dhe Osman Mula e vajza e tij Evisi, për të cilin nuk nguroi të flasë plot pasion.

Inva Mula në "La Skala"

Së shpejti do të gjenden në Itali, të dy së bashku çifti, Nina dhe Avni Mula. Këtë herë do të qëndrojnë gjatë. Arsyeja: do të ndjekin koncertet e vajzës së tyre në Itali, e cila tashmë ka fituar një famë botërore, të papërsëritshme, Inva Mula. "Bashkë me Ninën do të nisemi për në Itali, në Milano, në datën 15 prill. Inva do të ngjitet në "La Skala" për të interpretuar në operën "Manol", tregon Mula, teksa lotët i rrjedhin faqeve. "Jemi shumë të lidhur me të dhe ndihem shumë krenar, që Inva është vajza ime, pasi ka punuar dhe sakrifikuar pambarimisht", shton mjeshtri. Ndërsa para pak kohësh Inva sapo është kthyer nga një tur koncertesh në Madrid të Spanjës.