|
Friday, 31 March 2006 |
| Të rinjtë shkodranë të ndiejnë pak aromë France | | Java e frankofonisë, e pranishme dhe ambasadorja franceze
Pak erë “Francë” ka zbutur dje ajrin e lagësht të Shkodrës.
Në kuadrin e aktiviteteve të përvitshme, Aleanca Franceze, dega Shkodër, ka organizuar në kinema “Millenium“ një spektakël me rastin e javës së frankofonisë. E veçanta e spektaklit të organizuar këtë vit, ishte pjesëmarrja e vetë ambasadores franceze Bourolleau, si dhe të funksionarëve të tjerë të ambasadës franceze në Tiranë.
Në spektaklin e titulluar “Kultura shqiptare dhe franceze në Shkodër”, përveç ambasadores franceze, ishin të pranishëm dhe autoritet lokale, kryetari i Bashkisë, Artan Haxhi, rektori Mahir Hoti, drejtori i Drejtorisë Rajonale të Arsimit Shkodër, Loro Mandi, frankofonë të fushave të ndryshme si dhe prindër e nxënës që mësojnë gjuhën frënge.
Sipas shefes së degës së Aleancës Franceze në Shkodër, të quajtur si antenë e aleancës në qendër, Dhurata Hoxha, organizimi i spektaklit me rastin e javës së frankofonisë, ky vit përkoi dhe me dy ngjarje të rëndësishme për frankofonët e qytetit të Shkodrës, siç është hapja e degës së gjuhës frënge në Universitetin “Luigj Gurakuqi” të Shkodrës, si dhe pjesëmarrja e një grupi të rinjsh nga shkolla e mesme “28 Nëntori”, në një aktivitet rinor që do të zhvillohet në Francë, gjatë muajit maj të këtij viti.
Aktivitetet me rastin e javës së frankofonisë filluan në ambientet e gjimnazit “28 Nëntori”, ku nxënësit që do të marrin pjesë në aktivitetin rinor në Francë paraqitën për të pranishmit një sërë fotografish dhe pikturash të ekspozuara në ambientet e shkollës së tyre. Më pas, aktivitetet vazhduan me një spektakël ë organizuar nga nxënësit dhe studentët e Aleancës Franceze.
Në fjalën e saj të hapjes, drejtuesja e Aleancës Franceze në Shkodër, Dhurata Hoxha, shprehu falenderimet për mbështetjen që ambasada franceze jep për mësimin e gjuhës frënge në qytetin e Shkodrës, për rektorin e Universitetit Hoti, si nismëtar i hapjes së degës së gjuhës frënge në Universitetin e Shkodrës, si dhe mësuesit dhe nxënësit që kontribuan në organizimin e aktiviteteve me rastin e javës së frankofonisë.
Gjatë spektaklit, ranë në sy interpretimet e nxënësve në frëngjisht, të pjesëve të ndryshme të letërsisë franceze, si dhe interpretimi mjaft prekës i legjendës së Rozafës në frëngjisht, që emocionoi pa masë të gjithë të ftuarit dhe, sidomos vetë ambasadoren franceze.
Në fund të spektaklit, ambasadorja franceze vlerësoi cilësinë e lartë të organizimit, punën plot pasion dhe përkushtim të mësuesve të Aleancës Franceze në Shkodër, nivelin e lartë gjuhësor të nxënësve dhe studentëve, si dhe theksoi interesin gjithnjë e në rritje që po tregojnë të rinjtë shkodranë ndaj gjuhës frënge.
Ky interesim vihet re nga vetë numri i konsiderueshëm i të rinjve shkodranë, që mësojnë gjuhën frënge pranë Aleancës Franceze në Shkodër, për të cilën vlen të përmendet puna mjaft e mirë e vetë drejtueses Hoxha dhe gjithë stafit.
Pas spektaklit, me mjaft interes u prit edhe një ekspozitë me punime të ndryshe nga nxënësit e shkollës së mesme artistike “Prengë Jakova”, ku ishin paraqitur punime të ndryshme me emblema, monumente dhe bukuri të tjera të Francës.
|
|
n`Shkoder
Dëshiron te publikosh diçka qe mendon se eshte ne sherbim te komunitetit te qytetit tend?!! 
