BRIKENA SHLLAKU

SHKODER

Asnjë nga ndërtimet e kryera vitet e fundit në qarkun e Shkodrës, nuk është mbështetur mbi studimet gjeologjike”. Kështu bën të ditur Drejtori i Ndërmarrjes Gjeologjike për rajonin e Shkodrës, inxhinier, Stak Vukaj. Ai tërheq vëmendjen e drejtuesve të pushtetit vendor, me qëllim që t’i jepet fund një praktike të tillë, e cila mund të rezultojë me pasoja fatale për jetën e qytetarëve. “Pozita gjeografike, ka ndikuar që nëntoka e rajonit të Shkodrës të jetë më e pasur me ujëra nëntokësore, krahasuar me qytetet e tjera në vendin tonë. Për këtë shkak, drejtuesit e zyrave urbanistike duhet të detyrojnë subjektet, si ato private edhe shtetërore që para se të ndërtojnë, të drejtohen pranë ndërmarrjes sonë, me qëllim që të kryejnë analizat gjeologjike të tokës”,- thotë ai. Sipas tij, si rezultat i zhvendosjes së sipërfaqeve nëntokësore, një pjesë e konsiderueshme ndërtimesh, që janë bërë vitet e fundit kanë nisur të pësojnë plasaritje dhe dëmtime. “Qytetarët kanë qenë të paduruar, për ndërtimin e banesave apo godinave të subjekteve tregtare dhe kanë neglizhuar kryerjen e këtyre analizave. Mbi kurrizin e tyre, tashmë do të rëndojë një faturë akoma më e madhe për rikonstruksionin e ndërtimeve, sesa do t’u kishte kushtuar kryerja e analizave gjeologjike”, - thotë Vukaj. Ai pohon se të pakujdesshme janë treguar edhe firmat private, që kanë marrë përsipër të kryejnë ndërtimin e akseve të rëndësishme rrugore. Si shembull ilustrues ai paraqet rastin e dy rrugëve, asaj të Murriqanit dhe aksit Shkodër-Koman. Sipas tij, këto dy rrugë kanë pësuar zhvendosje dhe në periudhën e dimrit, si pasojë e reshjeve të shiut, mbulohen me masive mbeturinash inerte që rrëshqasin prej skarpateve të kodrave.