Shkodra - Informacion, lajmerime e kulture per shkoder e rrethina.- InfoShkodra.com - Gilman Bakalli: Berisha ka një problem të madh me Shkodrën

Ju jeni ketu: Home

Intervista

Gilman Bakalli: Berisha ka një problem të madh me Shkodrën

Monday, 21 May 2007

gilmani.jpg.jpg Gilman Bakalli: Berisha ka një problem të madh me Shkodrën

Shkruan : Skender Minxhozi

Kush është Gilman Bakalli?

Kam lindur dhe jam rritur në një familje, e cila, si shumë familje të tjera të qytetit të Shkodrës e ndjeu peshën e përbindshme të diktaturës që instaloi Enver Hoxha dhe klika e tij. Babai im vuajti 15 vite burg nëpër kampet dhe burgjet më famëkeqe të asaj kohe, kurse nëna u shpronesua dhe kaloi disa vite nëpër bodrumet e një shtëpie në periferi të qytetit. Keto dy elemente do të vulosnin në një farë mënyre edhe jetën time, duke bërë që të ndjehesha i margjinalizuar nga shoqëria.
Kur diktatura dhe shenjat e para të dobësisë, m’u dha e drejta të studjoja gjeologji në Tiranë, studim që do ta ndërprisja për t’iu dhënë ëndrrës së kahershme të cdo të riu të asaj kohe: ëndrrës për të jetuar jashtë shtetit. Kriza në rritje e identitetit që më shoqëroi në vitet e emigracionit, bëri që në vitin 1996 të kthehesha në Shkodër dhe të filloja studimin e gjermanistikës, të cilin e përfundova në Graz të Austrisë, ku edhe bëra doktoraturën në Letërsi dhe filozofi. Paralelisht kam punuar si pedagog i lëndës letërsi e vendeve gjermanishtfolëse dhe kam drejtuar institutin e gjermanistikës në Universitetin e Shkodrës.

Së fundi ju keni ndërmarrë një hap të fortë – jeni larguar nga grupi parlamentar i shumicës. Cfare impakti ka pasur në zonën tuaj elektorale ky gjest? Ka pasur nga ata që kanë thënë se pas gjestit tuaj qëndron një llogari e vogël politike, për të fituar mbështetjen e votuesve tuaj në zonën numër 4?

Impakti që ka shkaktuar largimi im nga grupi parlamentar i PD ka qenë absolutisht pozitiv dhe i ka tejkaluar të gjitha pritshmëritë e mia. Ai ka nxjerrë akoma më në pah krizën e madhe që ka pushtuar Partinë Demokratike, krizën e identitetit të saj. Akti im ka tronditur pikërisht ato shtylla, ku PD pretendonte se mbahej prej vitesh.

Keni folur për klane në Shkodër. Cilat jane ato?

Kur brenda grupimeve të ligjshme dhe të njohura publikisht krijohen nëngrupime, të cilat synojnë të tërheqin pushtetin politik dhe ekonomik drejt vetes, duke përjashtuar të tjerët mund të flasim pa hezitim për klane. Brenda Partisë Demokratike në Shkodër, e cila që në vitin 1990 mban pa ndërprerje pushtetin lokal, është krijuar një grupim, i cili në mënyrë të dukshme priret kah akumulimi i pushtetit politiko-ekonomik, duke përjashtuar përfaqësues me mandat politik. Ky klan ka në përbërjen e tij persona, të cilët, tash së paku 10 vjet, ia kalojnë njëri-tjetrit funksionet e larta qoftë në Partinë Demokratike, qoftë në administratën e lartë lokale. Pushteti politiko-ekonomik është kufizuar pra në një grusht njerëzish, të cilët janë përgjegjës direkt për degradimin e ngadalshëm, por të sigurt të qytetit të Shkodrës.

Kur udhëton në Shkodër, ndjen se në atë qytet koha “ka ngrirë”. Ju si deputet i Shkodrës, si e shpjegoni qe qyteti juaj pësoi një dekadencë të tillë ndër vite? Cilat janë sipas jush shkaqet?

Jo vetem shqisat, por edhe statistikat të japin të drejtën ta cilësosh gjendjen ekonomike të qytetit të Shkodrës si tejet të ulët. Situata bëhet e pashpresë po të kesh parasysh faktin se çdo vit krijohen organizata vendase e të huaja, të cilat nuk bëjnë gjë tjetër veçse e konstatojnë një gjendje të tillë, kurse për përmirësimin e saj mungojnë herë njerëzit, herë burimet financiare, herë të dyja.
Faktori kryesor që e ka çuar qytetin në këtë gjendje mendoj se është “njeriu i ri”, si pjella më e shëmtuar e komunizmit shqiptar. Këtë njeri, në variantin e tij primitiv, e kemi parë dy herë me kazëm në dorë duke shkatërruar: një herë në vitet 60 kur prishte kisha e xhamija dhe një herë tjetër në vitin 97, kur i vërsulej po me kazëm dhe me mjete të tjera më të sofistikuara institucioneve shtetërore dhe biznesit, duke plaçkitur dhe shkatërruar atë që kishte ndërtuar vetë gjatë disa viteve. Versioni modern i këtij njeriu sot vegjeton në administratë dhe shkatërron dalngadalë – pa kazëm – por në mënyrë të sigurtë institucionet shtetërore, pikërisht atje ku projektohet dhe administrohet mirëqënia publike.

Si mendoni se do të dalë qyteti i Shkodrës nga prapambetja?

Shkodra është ndoshta njëri nga të vetmet qytete ku burimet njerëzore janë vënë në garë për të shkatërruar burimet e mrekullueshme natyrore që disponon qyteti. Për këtë arsye gjykoj se vetëm një administratë e disiplinuar dhe profesionale mund ta ringjallë qytetin e Shkodres. Ringritja e administratës, fatkeqësisht pengohet nga partitë politike, të cilat e kanë kthyer në sistem ndërtimin e institucioneve mbi bazën e bindjeve politike. Për aq kohë sa vendet kyce të administratës lokale zihen nga njerëz, të cilët si meritë të vetme kanë besnikerinë ndaj partisë, gjërat në këtë qytet nuk do të ecin përsëmbari...

A ka të drejtë sot PD të kërkojë pushtet në Shkodër, kur qeveris qytetin prej 16 vjetësh?
Mendoj se PD ka tashmë një problem të madh në Shkodër, ajo duhet të përligjë pushtetin e saj në këtë qytet, të tregojë haptas se cilën shtresë përfaqëson ajo dhe cka bërë deri më sot për të.

Cila është sipas jush përgjegjësia e zonjës Topalli në këtë gjendje që kalon sot Shkodra?

Përgjegjësia e zonjës. Topalli ka të bëjë me faktin se ndaj gjendjes gjithnjë e në degradim të qytetit ajo ka reaguar thjesht me një retorikë vajtuese, me të cilën synonte thjesht të prekte emocionalisht zemrat e zgjedhësve shkodrane. Që nga 3 korriku, ajo ka influencuar direkt “reformimin” e administratës lokale të Shkodrës, reformim i kryer vetëm mbi baza partiake dhe klienteliste. Aktualisht Bashkia në Shkodër është plotësisht e paralizuar, rrugët e filluara kanë mbetur përgjysëm për mungesë fondesh. Në këtë gjendje, të vazhdosh të mbrosh me fanatizëm qeverinë se ka shtuar fondet për investime në Shkodër, do të thotë se zonja Topalli i ka hipur kalit të një optimizmi krejtësisht të papërligjshëm.

Si e gjykoni mënyrën sesi zonja Topalli e ka drejtuar Kuvendin në këto dy vjet?
Diletante, deri në provokuese.

Kreu i shumicës Bamir Topi po fillon të bëjë rezistencë në grup. Si e gjykoni qëndrimin e tij?

Kur një politikan i moderuar si z.Topi reagon me skepticizëm ndaj disa projektligjeve të qeverisë dhe arrin në moment të fundit ta shpëtojë seriozitetin shpesh herë të munguar të parlamentit shqiptar, tek unë ngjallet shpresa se ndoshta në momentin e duhur ky person do të mund të gjejë forcat dhe njerëzit e duhur për t’i kthjelltësuar ujërat e turbulllta në të cilat po lundron anija e politikës shqiptare...

A do të votonit eventualisht për Fatos Nanon si President? Cila prej kandidaturave do të merrte votën tuaj?

Mendoj se nuk ka rrethana të cilat do të më detyronin t’i jepja votën pro kandidaturës se Nanos si President. Votën do ia jepja një kandidature të ekuilibruar, konsesuale e të diskutuar gjerësisht në publik.

Si e gjykoni faktin që qeveria e zotit Berisha ndodhet sot në konflikt me një pjesë të gjerë të shoqërisë shqiptare?

Për mendimin tim konfliktet krijohen për të shmangur vëmendjen e popullit nga problemet reale socio-ekonomike. Shpikja e pandërprerë e “armiqve” virtualë, të cilët qeveria i hedh herëpashere në skenën politike (korrupsioni, mafia, informaliteti etj), janë vecse tym, me të cilin qeveria synon të hallakasë vëmendjen e shqiptarëve nga problemet e mprehta ekonomike. Jemi ndoshta i vetmi vend në Europë që ende nuk ka regjistruar qytetarët e tij dhe pronat. Përballë këtyre dy problemeve, lufta kundër Prokurorit të Përgjithshëm merr përmasa donkishoteske.

A do t’i përmbaheni angazhimit tuaj ne Kuvend, për të mos votuar më në grup me pjesën tjetër të maxhorancës?

Mosvotimi në grup, natyrisht nuk përbën për mua një qëllim në vetvete. Me siguri mund të ketë projektligje të qeverisë, për të cilat do jap votën time pro. Sigurisht, largimi nga grupi e rrit shkallën time të lirisë, për të votuar vetëm në ato raste kur jam i bindur se i shërbej progresit.

A po krijohet brenda PD një fraksion politik anti-Berisha?

Mendoj se është akoma herët për të folur për një fraksion politik brenda PD. Një gjë është e sigurt, numri i të pakënaqurve brenda këtij grupimi është në rritje.