Shumë nga të pranishmit në ceremoninë e djeshme nuk e kishin besuar se Zef Gjoni mbushte 60 vjeç. Një përvjetor që tregon jo pak moshë megjithatë trajneri i ekipit të boksit të Vllaznisë, njëkohësisht dhe i atij kombëtar, nuk jep për kaq. Ndoshta kjo vjen falë sportit, gjallërisë që e karakterizon këtë njeri në çdo moment të jetës së tij. Megjithatë Zef Gjoni dje ka mbushur plot 60 vjeç. Një përvjetor i festuar në mënyrën më të mirë në ambjentet e Hotel Turizmit “Rozafa” në Shkodër dje në drekë. Në këtë banket kanë marrë pjesë shumë personalitete të jetës sportive dhe njëkohësisht dhe asaj politike. Ka rënë në sy prania e Ministrit që mbulon sportin, z.Bujar Leskaj i cili nuk ngurron të vijë në Shkodër asnjëherë kur bëhet fjalë për sportin e boksit. Po ashtu ka patur mjaft të ftuar edhe nga Tirana dhe rrethe të tjera të vendit, deputetë e politikanë, figura të shquara të sportit shkodran dhe atij shqiptar. Nën ritmin edhe të muzikës popullore shkodrane, i janë dhënë edhe disa tituj të akorduar sëfundi këtij personaliteti të sportit shkodran.

Kështu Këshilli Bashkiak Shkodër në mbledhjen e tij të fundit i ka akorduar Zef Gjonit titullin “Mirënjohja e Qytetit” që i është dhënë nga kryetari i këtij Këshilli Anton Leka. Ndërkohë drejtori i Sportklub Vllaznia, Gëzim Mema i ka dhënë titullin “Nderi i Sportit Shkodran”. Po ashtu edhe ministri Leskaj ka bërë të ditur se ka firmosur shkresën drejtuar Presidentit të Republikës për dekorimin e këtij trajneri me titullin “Mjeshtër i Madh i Punës”. Në këtë mënyrë, me këngë, humor e konsiderata të larta për Zef Gjonin ka kaluar e gjithë pasditja e djeshme e cila vërtet u konsiderua “dasma” e dytë për të. Urimi i të gjithëve ka qenë: “Edhe 100 të tjera Zef Gjoni”. Këtë urim ia jep edhe redaksia e gazetës “Sporti Shqiptar” duke uruar njëkohësisht ta kemi sa më gjatë pranë sportit këtë njeri të përkushtuar për t’i dhënë vendit tonë sa më shumë suksese në arenën kombëtare dhe ndërkombëtare.Gjergj KOLA