Boks.-Kampionati i dytë i boksit në Shkodër.Tashmë çdo gjë është e konfirmuar: në ditët e fundit të këtij muaji do të zhvillohet një tjetër kampionat boksi. Ai do të zhvillohet në Shkodër në ditët e fundit të këtij muaji. Lajmin e konfirmon trajneri i Vllaznisë dhe i ekipit tonë kombëtar Zef Gjoni i cili për “Sporti Shqiptar” thotë: “Kemi marrë konfirmimin e Ministrisë dhe tashmë jemi duke u bërë gati për kampionatin që do zhvillojmë dhe ku do jetë kampionati i vërtetë i boksit dhe jo ai që u zhvillua para disa ditësh në Tiranë”. Kësaj rradhe është “federata e re” që do të organizojë atë. Gjërat janë saktësuar të gjitha, janë konfirmuar edhe 6 prej ekipeve pjesmarrëse si dhe po bëhen përgatitjet e fundit për zhvillimin e këtij kampionati. Pas mbarimit të kampionatit tjetër që u zhvillua para pak kohësh në Tiranë e ku morën pjesë disa nga ekipet e vendit (kuptohet jo ato me peshë), grupimi i dytë i boksit shqiptar ka pritur vendimin e Ministrisë së Turizmit, Kulturës, Rinisë dhe Sporteve për njohjen e Federatës që ata kanë zgjedhur apo zhvillimin e një Asambleje të Jashtëzakonshme. Ndërkohë bëhet e ditur se kjo Ministri ditët e fundit e ka dhënë verdiktin e saj: Do njohi zgjedhjet e fundit të bëra nga Asambleja e këtij sporti. Pas kësaj njohjeje zyrtare drejtuesit e Federatës kanë filluar përgatitjet për kampionatin që do zhvillohet.

 Bëhet e ditur se është caktuar qyteti i Shkodrës për zhvillimin e këtij kampionati njëkohësisht janë vendosur edhe datat. Kështu për tre ditë me rradhë, më 26, 27 dhe 28 tetor boksierët më të mirë të vendit do të mblidhen në pallatin e sportit “Qazim Dervishi” për të matur forcat e tyre. Sipas organizatorëve, deri dje kanë konfirmuar pjesmarrjen në këtë kampionat 6 ekipe dhe pikërisht Vllaznia, Flamurtari, Apolonia, Tomori, Tirana 2006 (ish-ekipi privat Enea) si dhe Rozafa. Sipas trajnerit të Vllaznisë Zef Gjoni pjesmarrja pritet të jetë edhe më e madhe nisur nga fakti se mund të jenë edhe boksierë të ekipeve të tjera që mund të marrin pjesë. “Përveç boksierëve të këtyre 6 ekipeve presim të marrin pjesë edhe boksierë e ekipe të tjera për vetë faktin se do jetë një kampionat i cili do njihet nga ana e Ministrisë dhe për rrjedhojë në këtë kampionat do seleksionohen edhe boksierët e ekipit kombëtar e për më tepër do përcaktohen edhe sportistët që do përfitojnë rrogat për vitin tjetër”-ka thënë ai. Por ndërkohë lind pyetja: Cilët do jenë gjyqtarët që do arbitrojnë në këtë kampionat? Sipas Gjonit edhe në këtë pikë organizatorët e këtij kampionati i kanë marrë të gjitha masat e duhura për të mos u gjendur të papërgatitur. Kështu deri tani është siguruar gatishmëria e pesë gjyqtarëve tanë ndërkohë që do jenë edhe dy malazez dhe dy të tjerë nga Kosova. Në këtë pikë ajo që mbetet është vetëm zhvillimi i kampionatit të dytë të ringur shqiptar ku ajo që merret me mend me siguri të plotë është se niveli i këtij kampionati do jetë më i mirë se ai i zhvilluar ditë më parë nisur edhe nga niveli i boksierëve pjesmarrës.Gjergj KOLA