-Boks/-Vllaznia i thotë “jo” kampionatit kombëtar/Ekipi i boksit të Vllaznisë nuk do të marrë pjesë në kampionatin kombëtar të të rriturve që pritet të nisë nesër në Tiranë. Një gjë e tillë është vendosur unanimisht nga drejtuesit e këtij klubi. Madje ata e kanë njoftuar edhe Federatën për këtë gjë me një shkresë zyrtare që i kanë dërguar këtij institucioni. Ndër të tjera në këtë shkresë thuhej: “Ekipi i Vllaznisë nuk do marrë pjesë në asnjë aktivitet të rradhës për boksin pa u zgjidhur problemet për të cilat është në dijeni edhe Ministria e Turizmit, Kulturës, Rinisë dhe Sporteve”. Por bashkë me shkodranët në këtë bojkot të kampionatit duket se janë edhe disa ekipe të tjera, pikërisht ata që i japin tonin boksit shqiptar. Trajneri Zef Gjoni nuk mendon se ka për t’u zhvilluar kampionat pa pjesmarrjen e këtyre ekipeve. “Mendoj se është absurde të mendosh se do të zhvillohet ky kampionat pa pjesmarrjen e ekipeve kryesore. Më parë duhet të zgjidhen problemet e Federatës dhe më pas të mendohet për kampionatin”-ka thënë ai. Në këtë mënyrë pas disa problemeve të vogla të shfaqura mes dy federatave në miqësoren e zhvilluar para pak kohësh në Shkodër mes përfaqësueses së Shqipërisë dhe Kosovës, kjo do jetë përplasja e rradhës për dy Federatat.Gjergj KOLA