Meritat e mëdha të Anton Shkozës në përhapjen e sportit të xhudos në vendin tonë e për më tepër sakrificat e mëdha të tij për të punuar nga karroca e invalidit, kanë shkuar deri në veshin e presidentit të Republikës, Alfred Moisiu. Ky i fundit pak kohë më parë krahas disa dekorimeve të tjera, ka vendosur të nderojë edhe këtë njeri shumë pasionant. Për Shkozën ka ardhur “Medalja e Mirënjohjes” pikërisht për meritat dhe sakrificat e bëra nga ky trajner. Me këtë qëllim dje në Vau-Dejës, është zhvilluar edhe një ceremoni e bukur pikërisht me rastin e marrjes së kësaj dekorate nga njeriu që është lidhur përjetësisht pas xhudos. Kanë marrë pjesë në këtë ceremoni pjestarë të klubit Vllaznia, sportistë e trajnerë. Të gjithë kanë uruar Antonin për Medaljen që i ka dhënë vetë numri 1 i shtetit ndërkohë që vetë ai ka qenë i emocionuar e kjo është dukur edhe në fjalët e tij kur ka thënë: “I jam mirënjohës edhe Presidentit të Republikës për nderimin që më ka bërë duke vlerësuar së tepërmi punën time por njëkohësisht edhe sakrificat për të çuar më tej sportin e bukur dhe burrëror të xhudos”.Gjergj KOLA