Kur kampionati Evropian i Boksit për paratërinj po afron, Federata Shqiptare e boksit ende nuk duket se i ka vënë punët në vijë sa i takon përgatitjes së ekipit tonë kombëtar. Një gjë e tillë duket nga fakti se grumbullimi i tij ka vonuar shumë të fillojë nisur nga fakti që fondet e këtij aktiviteti nuk janë lëvruar akoma. Por kundër këtyre veprimeve të FSHBO-së ka dalë hapur trajneri i ekipit kombëtar të të rriturve Zef Gjoni, i emëruar posaçërisht për të qenë edhe pranë ekipit të U-17 për këtë aktivitet shumë të rëndësishëm. “Ajo që më çudit mua është heshjta e Federatës së Boksit. Ky është aktiviteti më i rëndësishëm i boksit qëështë zhvilluar ndonjëherë në Shqipëri dhe mundësitë janë që boksierët tanë të nderohen me medalje në këtë Evropian.

Por për të arritur këto suksese sigurisht që duhet punuar duke i krijuar sportistëve dhe trajnerëve kushtet e nevojshme për trajnim. Mosçelja ende e fondeve të këtij aktiviteti nuk është justifikim sepse një zgjidhje mund të ishte financimi për momentin i stërvitjes së ekipit tonë nga vetë presidenti i Federatës. Ai vetë ka premtuar se do të shpenzojë shuma të mëdha për boksin dhe ky do ishte rasti më i mirë për ta bërë këtë”-ka thënë gjoni. Ndërkohë prej dia ditësh, duke parë përgjumjen e Federatës, në Shkodër ka filluar grumbullimi i sportistëve të Vllaznisë që do përfaqësojnë vendin tonë nëkëtë Evropian. Për pasojë që nga e hëna e kaluar, 8 boksierë të Vllaznisë janë të grumbulluar në ambjentet e Hotel “Rozafa” të Shkodrës duke zhvilluar njëkohësisht një stërvitje shumë intensive nën drejtimin e trajenrëve Zef Gjoni e Besnik Gjetja. Një grumbullim i tij është mundësuar nga presidenti i boksit shkodran Flamur Hoxha si dhe klubi Vllaznia. Gjendja e boksierëve shkodranë që do përfaqësojnë Shqipërinë në Evropianin që zhvillohet në datat 12-18 qershor në Tiranë, duket mjaft e mirë dhe shpresat për medalje janë të mëdha. Ajo që pritet tashmë është grumbullimi edhe i boksierëve të Tiranës dhe Apolonisë që do plotësojnë numrin 13 të sportistëve të përzgjedhur për këtë Evropian, të cilët nën drejtimin e trajnerëve Besnik Gjetja dhe Gjergj Kasa do zhvillojnë përgatitjet e fundit për Evropianin.
Gjergj KOLA