Federata vendos: Play-off-i i të rinjve në Shkodër.Federata Shqiptare e Basketbollit tashmë e ka dhënë vendimin e saj: Play-off-i i kampionatit kombëtar të të rinjve do zhvillohet në Shkodër. Në këtë mënyrë kërkesa e drejtuesve të klubit Vllaznia është miratuar dhe tashmë mbetet vetëm zhvillimi i këtyre ndeshjeve. Në të vërtetë përveç Shkodrës ka qenë edhe Elbasani, një nga qytetet e mundshme për zhvillimin e plej-ofit. Por interesimi i shkodranëve në këtë mes ka qenë më i madh teksa edhe vetë kryetari i Bashkisë  Artan Haxhi ka kishte shprehur dëshirën për ta zhvilluar këtë veprimtari në qytetin e tij

. Në këtë mënyrë dje klubi Vllaznia është informuar për vendimin e Federatës dhe tashmë kanë filluar përgatitjet për zhvillimin sa më normal të këtij aktiviteti. Finalet e këtij plej-ofi do të zhvillohen në datat 29-30 prill në pallatin e sportit “Qazim Dervishi”. Kalendari i ndeshjeve të ditës së parë do jetë ai i skemës së zakonshme A1-B2 dhe B1-A2. siç bëhet e ditur skuadrat që kanë fituar të drejtën për të marrë pjesë në këtë plej-of janë Vllaznia, Dinamo, Tirana dhe Elbasani. Të katër këto skuadra konsiderohen shumë të forta dhe për pasojë pritet një rivalitet shumë i madh mes 4 ekipeve. Ekipi i Vllaznisë me trajner Roland Kokën duke qenë se do luajë edhe në qytetin e tij, konsiderohet më favoriti për t’u shpallur kampion për këtë vit por kjo mbetet për t’u parë pas përfundimit të plej-ofit.Gjergj KOLA